GOZE Û MURİYE

Goza qéndile dare serro berreqiye
Qılancıka beleke goza kakıle diye
Erjiye ve we, hetê goze ser cériye
Qafık ra xelesnê, fistera cı nikliye

Qılancıka beleke hama ve goze ra
Niste ve dalê de jü muriya reze ra
Kuya de ve goze, pé nikliya thuze ra
Goze nalêne, "Ez mırenu na deze ra"

Muriye cêrê qılancıka beleke vero
Solê goza qéndila kakıle mewero
"Saira mı çao qesêy kena xovero
Dı çekü vaze, qılêrê gosu va şero"

Qılancıke ré ki, wes amê na sowda
Céré ra, çıqa destvere amê avaz da
Esq û çéfê ho ra ki nat û bota vozda
Goze, xeleşiye ra, gır biye seré hardi ra

Goze gınê waro, serê hardê serdıni
Muriye, nımıte té, pê dalê pelgıni
"Ho vira nékenu, juya zê to rengıni
Ez to erzenu bextê Kemerê Duzgıni"

Qılancıke xêle feteliye ro ve goze
Péyniye de caverdé, şiye ve mıroze
Goze, usari biye gırs roze ve roze
Biyéne gırs, ho çarnêne hetê veroze

Goze, serre ve serre gırs u qolınd biye
Muriye; zere kerd teng, cı ra murodiye
Hem cayê ho bi teng, hem estêne ser, şiye
"Mekeré rındiye, mevéné xıraviye"

Zorê ho sero vi, goze; gos pa nêkuya
Dar û berê yê dormi, ve muriye huya
"Yê zolımunê dina rê tım û tım xuya
Çı dostiya lawo, yê dine sanıka luya"

"Xırave mırê amé, kewtu haranie
Çınayrê kewtune qılancıke vırenie
A roza vırêne, mırê amê koranie
Euro şiya tode, mırê mende lerzie"

"Çond hozari serra, qe ma serra nêşiye
Şiya dar û beri, boyna ma serro biye
Ma tan û tiji nêdiyê" vake muriye
"Xelas çino, hêşriye ke wenédariye”

Torné Thuji dano horo, na ve ma biya
Yé mayéma ki maqa fénda na muriya
Çımo ke serva sari berva, tım véjiya
Az néurzeno ra, şiya sari héşiriya

Torné Thuji -12.01.2007