-*-
MA VE XÊR Dİ

Mordem ke juvinira, ma ve xér di, vazo
Çin u xusumet u buxuz, tım péro derbazo
Merebaé mordemi maqa cıré zé duwazo
Bé merebai, zerre néweso, pıré marazo

Mereba sevevé juvini qa nas kerdene
Eve zerro wes ra venga isoni daene
Thowa çino, zé desté zuvini guretene
Weşiye ramıtena. Sevev niya werdene

Ma weşiye néramina, serva werdene
Sımıtene, ser u bıné ho ra kerdene
Né péro maqa serva weşiye ramıtene
Qimet bızoniyo, hata roza merdene

Ez ve mordemiye, vengé sıma hesnenu
Ez welaté ho, cao ke büne ğéyalnenu
Maqa ez naza caé wa u bırau zonenu
Qomi ré wahir, goni awxe néerzenu

Çiçeguné tırr u kasuné ma, yé rengınu
Cerduné mara ağwa héyniyuné serdınu
Dar u beré bırré ma yé verın pelgınu
Toway de névurnenu, kouné çengelınu

Kam ke, ver heté welati rao ke, şéro
Tım caé ho çımu sero, va avé béro
Qomo! Ma ré kam ke newaz u béxéro
Xızır, va hona ke rewo, ma ra bicéro

Êy! Kemeré Duzgıni, Thuzık Bava u Jéle
Goşkar, Karér, Mırcan, Bedro, Sulvıs u Çéle
Bağıra Sıpie, Sultan Bava u Kemera Bele
Unca dewuné ma périne de sop bıvo cele

Ma ez se ho vira kenu i jiaru, diyaru
Tede khalık u bavıké ma wedardaru
Mezelu, paguné dewu, gomu u waru
Torné Thuji u, kam vano cıra bézaru

Torné Thuji, 18. 09.2008

AĞAYÊ MA *

Kam vano qolayi a, ağaéni
Hawuré kar u bari biyaéni
Hal u demé qomi rınd zonaéni
Dem u dewrani ra xeber daéni

Xeveri diné to u qomé tora
Taé heqereti ki péra hora
Hem tek, hem téverra, yé to zora
Dina bexté toré verdera kora

Vizéri, meste, tı ağayé herrozi
Haydaré her çiyo pesew perozi
Kaméj ca, qe zımeyi, qe verozi
Kam beno qe bémırod, qe bérozi

Meke gerre, no qeder u talio
Hora béxever, kok ra nébelio
Cané tora, é(i) kerganu gılio
Qederé gula reze tım telio

Roza hirae de çéf u heduri
Toré ke lozım bené, kuné duri
Dest amera ver, bené ve çım suri
Dızdia to, kam bi, keno quduri

Qa hal u demé qomi tı zonena
Xelefe werte de kémi nébena
To ro se keré, cıra névérena
Torné Thuji çımde, na ağaéna

Torné Thuji

BELAÊ HO WAZENO

Déy gore, o qomé horé, xızmeta, keno
Pesew u peroz derdé qomi ré berveno
Hedur cıré çino, rehet qe nézoneno
Roza ke qom u péra déy ré çiyé beno


Bé heduro, caé de ho qe névındeno
Qimeté canweşia ho ki nézoneno
Ero xeveruné qom u pére céreno
Aqılé ho tedero, qe duri némaneno


Kewt ra ki, rehet hewn çımu nékono
Bé hewnie ré naza kes ilaz nézono
Ca o ke cıré ilazo, uza nésono
Duré uzayi, besenékeno sare rono


Hewna şéro, narae ki hewn de véneno
Ne omnan, ne zımıstano, béhewn maneno
Destasodır lıngo sero o, rew urzeno
Derdé ho gırané, coru teselie nébeno


Maqa qomé ho kılamuné déy waneno
Cıra zéde qedr u qimeté déy zoneno
Derdu keno téra, coka qom téy berveno
O ke bıhuyo, saré dormi téy huyeno


Çıqa qusıré ho beno, qom névéneno
Bıvéno ki, qe xatıré déy ra névéreno
Xırave cıré ama, dest ravér erzeno
Ma no Torné Thuji belaé ho wazeno

Torné Thuji

KILAMi SÉY NÉMANENÉ

Sayir, isono de qomé horé ro cano
Mezgé hora vırazeno, zerre ra vano
Béli nébeno kılamu kéy caverdano
Ma téniya ewro niyo, no qeydo khano


Viriya ho néano, ke klami séy manené
Déy péy de kılamu se, ya koti wanené
Qe cıré wayir véjiné, ya ki névénené
Sari sero ca kené, ya qimet nézonené


Hora xér névénené, eke duri vındené
Kılamé ho, ke qomi viri de némanené
Ne newe nusnené, ne khanu wanené
Céni u camord; pil u qız ke nézonené


Cıré wayiriyé, caé kılamu ke zonené
Bero u bécan niyé ke kılamu wanené
Coru kılami béwayir u séy némanené
Wayiriyé iyé ke qéreté qomi uncené


Eke nusniyé, coru béwayir némanené
Qomé déy ra hozonay cıré wayir bené
Hozonauné dina cıra xeverdar kené
Dina ollemi kılamu ra péhesnené


Sayiri, coru sayiru vira nésoné
Téynia nébené, piya wayiré zoné
Kılami ke nusné, wayiré ro u thoné
Kılami séy némanené, wayiri isoné

Torné Thuji-03.03.2009