Z.Dersim (şimdiye kadar 148 posta) | |
MEMO BOM KAMO
Memo Bom Kamo, Şinate u Hunerê Xo
Memo Bom, Nasrettin Xocê Dêsımiyo. Sayiro de gırso.
Memo Bom Bêxızo. Bêxu, en jê de dewanê Gımgımi (Varto), Xınıs u Asqale de estê.
Memo Bom, Bostan Wertiye rawo, ya ki en jêde na dewe de mendo, coka cıra vanê Bostan Wertiye ra Memo Bom. Rasta xo, wo Dewızê (maravê Çê Mire Begi biyo (Çê Sawuşen Begi). Ca ve ca, dewe ve dewe vuriyo ra. Vanê, Mem kata sono şêro, lewê sari de, Çê Miri ra qesa xıravıne, qesa çorte nevata. Hama her kes zaneno, qesê Memi hazırê, kam beno bıbo, yêk ri de vano.
Memi, xo ra Bom vatenê. Coka namê xo, biyo Memo Bom, hini amo nas kerdene. Ezı ki yita ge Bom nusnon, ge Mem nusnon, ge ki Memo Bom nusnon. Ni pêro namê diyê. Hama na namê kerdene de, heqeret ya ki qız vinitene çina. Çutıri vajiyo, çutıri ke qolay amo vatene, hini nusnonu. Namê xuyo rast Memedo. Yi ke qesey kerdene, “Memê to”, “Memê sıma” ki vatene.
Memo Bom, hazar u new se u seştu new de (1969) merd. Wo ve Alisan Begê Çarekıji ra jüvini ra nejdi merdi. Alisan Beg, Çê Miri ra bi. Cipê Alisan Begi, Derê Balavanu de raê ra vejiyay bi, gınayve çhemi rê. Vanê, cenaza Alisan Begi sere 3500 (hire hazar u phonc sey), yê Memê Bomi serê 7000 (hawt hazari) pangılote (pangınote) biya arê.
Mesela Hese de, vanê Çê Miri sungi, riveşi vastê. Mem rusno ke, arê do, biya ro. Mem sono, Hese de vejino. Taê vanê, hese ve khudiganê xo ra pia biyê. Taê vanê, hese qızane biya, eve Heşi ra pia biyê. Vanê, hesê raveri qarısê cı nebiya, eke kota düri, Memi cı ra xeveri do, hese cêra ra, Mem gureto pê, goni u gonaşir de verdo. Mem, xo ra vêrdo, xo no ro merdene. Hesê şiya ke çale bıkıno, Memi cı kero. Memi çutır ke fırsan diyo, xo tırri rê esto. Gındır biyo, şiyo fekê deri de vınıto. Pêydena amo ra xo ke, hao zerrê ağwe de ro. Wurzeno ra sono. Endi çutıri sono, zu Mem zaneno,....!
Vanê, hesê Mem zaf zeberno, sarrê çermey kerdo, lewi dırnê, wertê hermu ra gost veto. Halê Memi zaf berbat biyo, yanê xori biyo dırvetin. Çê Miri no esto aravê xo, berdo suke. Seşt roze, newesxane (xestexane) de mendo.
Memo Bom, feqır asenê, kınc u kolê xo khani bi, khortıkın bi, hama hini jêde feqırı ki nêbi. Şênê xo tım ra kerde bi, pırçın (rameti şêro re cı, jê heşi tukın) bi. Mı zu raê nejdi ra divi. Derê Balavanu de ameyve qewa Çê Bava Sawuşêni (Sa Wuşêni). Se ke bi nejdiyê qewa, qewa u wo nejdi de kam ke esto, dormê dey guret, sere bi arey (bi topi). Serre, hazar u new se u seşt u hawt ya ki seşt u heşti biye, ( 1967/68 ), payız bi. Ez wo taw mektev de biyu, mektev lewê qevade bi. Ma domanu rê qewa şiyaene yasağê biye. Coka ma qewa nêkewtime, hama çımê ma çever de bi.
Ez hini guman kon ke, mesela cığara fısqi, zu raê nê, dirê rey ama Memê Bomi sarrê de. A roze ki, wuncia çiyo de nianen biyo, Memi qesey vatê, wuyo ke cığara fısqi dayve cı, amo ke pıro do. Hama sari nêver do. Zu mesela de niaenê Munzur Comerdi nusnayvi. Mı ki na mesela hesnay vi, dunıka mı de nuşiyayiya. Hata nıka mı naê ra hire versiyoni hesnay. Na mesela ra dı versiyonu, cêr de nusnonu.
Memo Bom ke vajiya, çı yeno ra mordemi virri: (Memo Bom deyince akla ilk gelenler):
Pamuxe: Pamuxe, hera Memê Bomiya. Memo Bom, bê hera xuya Pamuxe caê nêşiyene, nêşiyo. Tım tey biya.
Gunê qurvu: Memê Bomi en jêde na çhekuyê ra cav dêne.
Mordem ke bese bıkero, xona Memê Bomi sere zaf malumat vineno. Taê nas kerdoğê Memê Bomi xona wesê. Mordem bese keno ninu ra xona xeyle çi bıhesno, arê do. Hama meselê dey, zafi ki vuriyê. Mordem bese keno, ni meseley koti vajiyê, lewê kami de vajiyê ya ki kami ser vajiyê, yinu ra pia qeyd kero.
Kılamanê Memedi ra mı xora jüye pêda kerde. Hama kılamê Memê Bomi zafê. Meselanê deyra ki, mı daese teni nusnayvi. Ninu ra tayine bınê ni nuşni de nusnonu.
Memê Bomi serê, Fecira u Munzur Comerdi, nusnêo de hewl, Berhem de nusnayvi, (Berhem, Sosyal ve Kültürel Araştırma Dergisi, Haziran, 1992/2). Na nusne de heqa Memi de xeyle çi nuşiyo.
Wastena mı, destê kami de ke heqa Memi de çiyê esto, çiyê zaneno, yi eskera kero, bınusno, qeyd kero. Kami de ke resmê Memi, kasetê Memi estê, yinu rındek bıseveknê hama hemi ki eskara kerê. İla ki çiyo nianen qeyd bo. Kam ke Memi nas keno, heqa dey de çıyê zaneno, beno ke nêşikino bınusno. Alvazê ma, mordemê nianeni ke dos kerdi, yinu qesey kerdene dê, qesey kerdena dinu qeyd kerê u bınusnê.
M. Tornêğeyali
Nisane, 2006
http://www.zazaki.de/forumeziwanugrameri/forum/messages/927.htm
http://f25.parsimony.net/forum62148/messages/23451.htm
http://dersimzaza.blogcu.com/memo-bom-kamo_1535956.html
http://www.iphpbb.com/foren-archiv/20/1236800/1235840/memo-bom-kamo-33096965-69579-33.html
|